Um Sýran Design

Yndisklæðir, móti og handarbeiði

Í yndisklæðunum er dagurin eitt sindur betri og lættari. Sólin skínur bjartari, fuglarnir láta vakrari og tú orkar og avrikar meiri. Yndisklæðini fáa teg at slappa av, hvíla og kenna frið. Tú hevur kensluna av at koma heim. Heim til tín sjálvs.

Yndisklæðini taka atlit til hesi fýra økini:

  • Kroppur, skap, litir og tilfar
  • Sjálvsfatan, sjálvsmynd, lyndi og persónsmenska
  • Umstøður, umhvørvið, uppgávur og móti
  • og so er tað prikkurin yvir I-ið, sum ger allan munin

Nógv av hesum veitst tú longu. Tú hevur tað í tær, tí tú kennir teg sjálva best. Hinvegin kann tað vera ein hjálp at gerast meiri tilvita um, hvat tað er, sum tú fer eftir. Læra at seta orð á orðaleysu vitanina. Gerast meiri greið og sleppa undan feilkeypunum. Lata tín máta at klæða teg, tín stíl, koma meiri undan kavi, mennast og lagast til lívið her og nú og framyvir.

Hjá Sýruni er menniskja í fokus. Fjøltáttaða, einastandani tú, sum hevur so nógv gott við tær. Saman skapa vit góðu loysnina, sum passar til tín og tín gerandisdag. Konkreta vitanin, einføldu amboðini og mannagongdirnar fær tú brúkt beinanvegin í gerandisdegnum. Stig fyri stig skapa vit ein stíl og eitt klædnaskáp, sum hevur tað besta til tín. Við yndisklæðum, sum eru løtt at brúka, seta saman og sum fáa gerandisdagin at glíða betri og lættari.

Mótin er ein spegling av tíðini, sum gevur tær íblástur og møguleika at uppliva nýggjar síður av tær sjálvari. Saman leita vit eftir yndisklæðunum í handlunum, finna nýggjar samansetingar, bróta onkur mørk og broyta tína fatan av, hvat ber tær til. Minnast skal til, at talan er um standardklæðir í tí skapi, liti og tilfari, sum eru á móta í løtuni. Onkuntíð skulu tey broytast ella rættast til fyri betri at passa til tín, innan sum uttan.

At velja fagrar litir, tógv og toy, sum fær sansirnar at syngja, gevur innlit í, hvat tær veruliga dámar. Og óansæð um tú dugir nógv ella lítið, fær tú við handarbeiði møguleikan at skapa títt egna frá grundini. Skilja klæðir, broyta og passa tey til tín kropp, tínar rørslur, tín gerandisdag. Handarbeiði hjálpir tær nærri tíni kjarnu og veksur um títt klædnavit, so tað gerst lættari hjá tær at skilja, hvat riggar og hvat tú skal leypa um. 

 

 

Katrina í Geil

Katrina hevur útbúgving sum Tekstildesignari við sergrein í binding frá Designskolen Kolding í 2005. Hon tók Master í Design (MD) á Kunstakademiets Designskole í Keypmannahavn í 2017. Afturat tí er  hon bankalærd, hevur verið aktiv í fakfelagsarbeiði og arbeitt fleiri ár innan ferðavinnuna. 

Fleiri enn 2.000 fólk hava síðani 2007 notið gott av hennara vitan og drúgvu royndum sum designari og masterstílistur. Í arbeiði sínum brúkar hon gransking innan design, estetikk, sálarfrøði, námsfrøði, tjóðlívsfrøði, innovatión og visuelt samskifti at skapa bestu loysnirnar til kundar sínar bæði her á landi og uttanlanda.

Hon veitir ráðgeving, skeið og fyrilestrar um estetikk, stíl og útstráling til privat fólk, stovnar og virkir. Eisini útbúgvir hon klædnastílistar á altjóða støði. 

Katrina samstarvar við sálarfrøðingar, fotografar og fólk innan klædnavinnuna og avleiddar vinnur. Hon hevur staðið fyri mótasýningum, framsýningum og størri verkætlanir her á landi og uttanlanda umframt at skriva greinar og tekstir til bøkur og bløð. Í løtuni er hon í holt við at skriva eina bók um Burðardygga klædnaskápið, sum hevur fingið stuðul frá Tórshavnar Kommunu.  

Willemoes Proconsult, Eik, BankNordik, LookNorth, Rúsdrekkasøla Landsins, Kvinna, Sansir, Hogra, MBM, Klaksvíkar Sjúkrahús, Pedagogfelagið, Peter Jensen, Norðurlandahúsið, Kringvarp Føroya, Løgtingið, Tórshavnar Kommuna, Runavíkar Kommuna, ALS, Nordic Fashion Biennale, Estonian Ministry of Culture, Nordisk Institut på Åland, Norðurlandahúsið í Reykjavík, The Loop Festival, KreaNord, Mentamálaráðið, Listaleypurin, Kvøldskúlin í Fuglafirði, Heilsufrøðiliga Starvsstovan, Landsverk, Elektron, Húsarhaldsskúli Føroya, Nám, Sendistovan, Kvøldskúlin á Tvøroyri, Svend Krosstein, Føroya Tele, Skótarnir við Løkin, Dagstovnurin Sólareyga,  Shari, Diana, TAKS, Norðoya Sparikassi, Dugni, Skilling, Suðuroya Sparikassi, Dagstovnurin við Botnánna, Grønu skótarnir, Tjarnargarður, Tjaldurs Apotek, Suðuroyar Sjúkrahús, Almannaverkið, Ung í Føroyum, Føroya Studentaskúli, Klaksvíkar Sjúkrahús,  SMS, Hugskotið, Greengate Incoming, Arena Travel, Nordisk Striksymposium, Rowan Tree Travel, Jarðfeingi, Eina, Diana, Føroya Skjalasavn, Hotel Vágar, Biofar, Eina, Arbeiðslív, Atlantic Airways, Knitting Iceland, Posta, Havnar Arbeiðskvinnufelag, HK-Føroyar

Viðskiftatreytir

Gjaldstreytir
Tilmeldingin til eitt av okkara tiltøkum er bindandi og skal vanliga gjaldast beinanvegin. Aðrar gjaldstreytir verða lýstar í samband við tiltakið. 

Um tær ikki ber til at møta, hevur tú møguleika at lata plássið til onkran annan. Hetta kann vera vinfólk, familja ella starvsfelagi.

24 tíma angrirætt
Tilmeldingina kanst tú angra innanfyri 24 tímar eftir at tú hevur tekna teg. Hetta ber til fram til eina viku áðrenn tiltakið byrjar. Tú angrar við at senda teldupost til syran@syran.fo

Avlýsing
Um tú hevur teknað teg til eitt av tiltøkunum hjá okkum, hevur tú játtað gjaldstreytirnar. Tá eru hesar reglur galdandi:

Tín tilmelding er bindandi, óansæð um tú hevur goldið ella ikki. 

Tú er altíð vælkomin at senda annan luttakara fyri teg. Um tú av eini hvørjar orsøk ynskir at melda frá, eru hesi gjøldini galdandi fyri avlýsingar:

– Avlýsing meiri enn 8 vikur áðrenn tiltakið: 10% av kostnaðinum
– Avlýsing meiri enn 8 og 4 vikur áðrenn tiltakið: 50% av kostnaðinum
– Avlýsing minni enn 4 vikur áðrenn tiltakið: 100% av kostnaðinum

Gera aðrar treytir fyri avlýsing seg galdandi, verða tær lýstar í samband við tiltakið. 

Forfall
Ber tað so illa til, at skeiðsleiðarin/fyrilestrahaldarin ikki fær komið av orsøkum, sum Sýran Design ikki frammanundan kann tryggja sær ímóti, tilskila vit okkum rættin at finna annað skikkað fólk at halda skeiðið/fyrilesturin. Orsøkirnar kunnu vera sjúka, seinkingar orsakað av ferðing, okkurt, ið stingur seg brádliga upp ella annað, sum viðførir, at ikki ber til hjá viðkomandi at møta. 

Hendingar, sum koma undir force majeur, kunnu gera tað neyðugt at útseta skeiðið/fyrilesturin ella at veita tað við øðrum skeiðsleiðara/fyrilestrahaldara. 

Er tú luttakari og fær ikki møtt til eitt tiltak, sum tú hevur teknað teg til, eru avlýsingartreytirnar omanfyri galdandi. Minst til, at tað altíð ber til at senda annan luttakara fyri teg. 

Innanhýsis skeið/fyrilestur
Reglurnar, ið standa omanfyri, eru eisini galdandi, tá tú hevur bílagt innanhýsis skeið/fyrilestur frá Sýran Design.

Sýran avlýsir
Ber so til, at Sýran Design avlýsir tiltak vegna ov fáar tilmeldingar, so fær kundin sjálvandi allan peningin aftur. Tá mugu vit hava eitt kontonummar at flyta peningin á. 

Viðmerkjast skal, at vit royna alt hvat vit kunnu at gjøgnumføra øll skeiðini/tiltøkini, sum vit seta á skrá. Tí kemur tað næstan ikki fyri, at eitt tiltak verður avlýst. 

Broytingar, sum vit onga ávirkan hava á, taka vit fyrivarni fyri.